بقلم / أحمد فؤاد نجم
متابعة / أيمن نصر
***********************
بستنظرك رغم القساوة
في منظرك
لحظة هروبك يا رباب
م الحب لما استنصرك
بستنظرك
بستنظرك
رغم الشـــــتا والبرد
والرعد المخيف
بستنظرك
ف الشارع المشغول
بأوحال الرصيف
أنا اصلي حاســــب
موعدك وعارف اللي
بيبعدك
وأنا اللي خابر تبقي مين
وأنا اللي صابر من سنين
وبعدّ لك مطرح
ف بســــتان الامل
وبامدّ لك
وف كل خطوة
أمدّ لك ايدي
اللي شققها العمل
مدي الخطاوي يا حبيبتي
وقــدّمي
وان كنتي خايفه م الطريق
اتبسمي
يا شــــمس ياللي ضحكتك
قمر ينور ســـكتك
أنا اللي عشقك عزّني وانتي
اللي عشقي ستتك
بستنظرك يا جرحي
يا حلمي العنيد
بستنظرك يا مصر
يا حبي الوحيد
وحتيجي يوم وتصدّقي
عشقي الأصيل وتحققي
حلمي الجميل وتزوقي
عمري اللي ضاع مستنظرك
بستنظرك
بستنظرك.